" ဟိုမှာ...ဟိုမှာ ကျမပိုက်ဆံအိတ် ဟိုလူ့လက်ထဲမှာ ကယ်ပါဦး... မိအောင်ဖမ်းပေးပါဦးရှင်..."
အမျိူးသမီးတစ်ယောက်က ရဲဝန်ထမ်းတစ်ယောက်ကို အတင်းခေါ်လာရင်းပြောလိုက်တယ်...။ သူညွှန်ပြတဲ့နေရာမှာတော့ ခပ်နွမ်းနွမ်းလူတစ်ယောက်ဟာ ပိုက်ဆံအိတ်တစ်လုံးကိုဖွင့်ကြည့်နေတယ်...။ သူတို့အနားရောက်တော့ ရဲကတရားခံလို့ယူဆရတဲ့လူကို ဂုတ်ကနေကိုင်လိုက်တယ်။ အမျိူးသမီးကလည်း ပိုက်ဆံအိတ်ကိုဆတ်ကနဲဆွဲယူပြီး ဖွင့်ကြည့်တယ်...။
" ဟင်... ကျမပိုက်ဆံတွေလည်းမရှိတော့ဘူး... ဘယ်မလဲကျမပိုက်ဆံတွေ ပြန်ပေး... ကျမသားကျောင်းလခပေးဖို့ ခြစ်ကုတ်စုထားတာလေးတွေ ... ဒီနေ့နောက်ဆုံးပေးရမှာ...ဘယ်မလဲ ...ပြန်ပေးပါ... ကျမနောက်ကျနေပြီ..."
ဟိုလူကလည်း အမျိူးသမီးကို သေချာကြည့်ရင်း သူ့အိတ်ကပ်ထဲက ပိုက်ဆံအချိူ့ ထုတ်ပေးလိုက်တယ်။ ဒီတော့ရဲဝန်ထမ်းက...
" အမကြီး ပိုက်ဆံပြန်ရပြီမဟုတ်လား... ကျောင်းလခပေးစရာရှိသွားပေးပေတော့... ကျနော်သူ့ကို စခန်းခေါ်သွားလိုက်မယ်..."
" ကျေးဇူးတင်လိုက်တာ ရဲမင်းကြီးရယ်...ကျမနောက်ကျနေတာအမှန်ပါ... သွားလိုက်ပါဦးမယ်..."
အမျိူးသမီးလည်း ကျောင်းဆီကို သုတ်ချေတင်တော့တာပေါ့... ကျောင်းလခအချိန်မှီ မပေးသွင်းနိုင်ရင် သားလေးမျက်နှာငယ်ရမှာကိုး... ဒီလိုနဲ့ လမ်းရောက်တော့ ပိုက်ဆံတွေပြန်ရေကြည့်တယ်...။ ဟင်... ပိုက်ဆံတွေကပိုနေပါလား......!!!
ဒီလိုနဲ့ နောက်တစ်လလောက်ကြာတော့ ထုံးစံအတိုင်းကျောင်း လခသွင်းဖို့ ထွက်လာခဲ့ပြန်တယ်... အရင်လက ပိုက်ဆံအိတ်အနှိုက်ခံထားရတော့ သတိထားပြီးသွားနေရတာပေါ့ ...ဒါ့ကြောင့် လမ်းမှာ လူတစ်ယောက် သူ့နောက်ကလိုက်နေတာ သူသတိထားမိလိုက်တယ်... ကြည့်လိုက်တော့ ဟိုတစ်ခေါက်က ဖမ်းမိခဲ့တဲ့သူ... ရင်ထဲထိတ်သွားတယ်...။ ခပ်သွက်သွက်လျှောက်လာရင်း လမ်းမှာ ရဲဝန်ထမ်းတစ်ယောက်ကိုတွေ့တော့ အကူညီတောင်းလိုက်တယ်...။ တိုက်တိုက်ဆိုင်ဆိုင် ဟိုတစ်ခါကူညီပေးခဲ့တဲ့ရဲပဲ...။ ရဲကလည်း နောက်ကလိုက်နေသူကိုခေါ်လိုက်တယ်... ဟိုအရင်ဖမ်းခဲ့ဖူးတဲ့သူဆိုတာသိတော့မှ အမျိူးသမီးကိုရှင်းပြတယ်...
" ဟိုတစ်ခေါက်က အမကြီးပိုက်ဆံအိတ်ကိုနှိုက်တာသူမဟုတ်ပါဘူး... သူက လမ်းမှာတွေ့လို့ ပိုင်ရှင်ပြန်အပ်ဖို့ရာ ပိုက်ဆံအိတ်ကိုရှာဖွေနေတုန်း ကျနော်တို့ တွေ့တာပဲ..."
" ဟင်... ဒါဆို သူကဘာမှမပြောဘဲ ဘာလို့ပိုက်ဆံထုတ်ပေးလိုက်သလဲ" ဒီတော့ ဟိုလူကဖြေတယ်...
"အစ်မရဲ့ကလေး ကျောင်းလခပေးဖို့လို့ကြားလိုက်လို့ပါ...ကျနော်ကိုယ်တိုင် မိဘက ကျောင်းမထားနိုင်လို့ ပညာကောင်းကောင်းမသင်ခဲ့ရဘူးလေ... ခုလိုက်လာတာဟာလည်း ဒီလအတွက် ကျောင်းလခကို ခါးပိုက်နှိုက်မခံရအောင်... နောက်ကနေစောင့်ရှောက်ပေးဖို့ပါ..."
" ရှင် !!! "
0 comments:
Post a Comment